20個月大懷疑自閉傾向，點算?

問：「你好！如果我小朋友得20個月，可能有 #自閉傾向， 同人溝通非常差，都好擔心，好徬徨，應該點？」

補充資料：

1. 未評估。只是健康院醫生轉介，宜家正在輪侯評估中

2. 行路冇問題。未能發出有意思單字，好怕陌生人，出到街連bb話都唔肯講。陌生人撩佢，又唔笑

答： 初步睇，有需要跟進下小朋友說話發展會唔會有啲慢，有冇自閉傾向要全面評估先可以知道。我認為如果唔係排太耐嘅話，你可以繼續等衛生署評估，而衛生署係做得好全面嘅。 但治療同訓練我覺得唔駛等，因為大部分研究結果都係越早訓練對小朋友越好，一歲幾都可以開始架喇。 我提議你先搵有做開幼兒個案嘅 #主診心理學家 見一見先，決定療程同訓練方法。

政府要你有診斷先可以排訓練服務，你可以先選擇慈善機構評估或訓練服務，我可以轉介幾個比你參考，通常都要等一段時間。你亦可以選擇私人服務，等嘅時間會短啲。

希望幫到你﹗

Edge教育心理學家團隊